மதுவாகினி

குறி அறிதல்

வெய்யல் பொசுக்கிய
புழுதி படிந்த வயோதிக நிலத்தில்
நிழல்விழ நின்ற வேலிமுள்ளின்
அருகமர்ந்து விடுகதை இட்டவாறு
வெளியேற்றிய கழிவுகளின்
வீச்சத்தால் நாசி தேய்த்து
நேற்றைய குழம்பு கூறி நகைத்து
திருட்டுத்தனமாகப் படித்த
அண்ணன்களின் காதல்வரி ஒப்பித்து
வாத்தியார்களை ஏமாற்றிய
வல்லமையைப் பாராட்டி
குழி தோண்டிப் பரித்த
திருட்டுக்கிழங்கின் சுவை பகிர்ந்து
கபட உறவுகளின்
களிப்பை ரசித்த காட்சி விளக்கி
ருசி அறிந்த புளியமரத்தின்
ரகசியம் பேசி
இரவுக் காட்சியின் கதை வியந்து
எழுந்து வரும்முன் மறவாது
நீண்டிருக்கும் நிழலைக் கணக்கிட்டு
சேக்காளிகளின் குறி நீளம் அறிவோம்...

நன்றி: கல்குதிரை