நன்றி: உதிரிகள்

 பொழுது

*

காலங்கள் குறித்து 

கவலை கொள்ளான்

பழக 

பாலும் புளிப்பதான

நம்பிக்கை கொண்டவன்

நல்ல நாள் தனித்தில்லை

எல்லா நாளும் நமக்கானதென

கடுகளவு 

மிளகளவு

நீண்டிருக்க

சற்றே கூடுதலாக்கி

ஒரு பிடி பகலவனை

உண்ணத் தொடங்கினான்.

மழை

*

வல்லமையை வளர்த்துக் கொண்டவன்

பரிசோதிக்கக் காலம் வந்தது

நள்ளிரவு என்பதால்

சாட்சிகள் இல்லை

தன்னை நனைத்திடாது

பெய்யச் செய்தான் 

ஒதுங்கி.

பனி

*

கதவு சன்னல்களை 

அறைந்து சாத்தி

சிறு சந்தில் 

துணி வைத்து அடைத்து

போர்வைக்குள் ஒடுங்கிக் கிடக்கும்

எல்லோரையும் ஏளனமாகப் பார்த்து

ஏதுமாற்று உறங்கப் போனவன்

ஆதி சினேகனாக

அடர்வனத்து கனவில்

நித்திரை கொண்டான்.

ஆறு

*

முயற்சிகள் பலன்

அற்றுப் போவதை ரசித்து

இப்படித்தான் என

சொல்லில் காட்சிபடுத்தி

தன் உடலை தக்கையாக்கி

மிதந்தவளை 

ஆறு தாய்மையோடு

தாலாட்டிக்கொண்டிருக்க

வானத்தின் ஒற்றைக் கண்

உக்கிரம் அடைகிறது.