மதுவாகினி

ஆதித்தாய்

விதைகளைச் சுமந்து
வீதியிலே கூவி வந்த
கிழவியின் குரலை கேட்பார் யாருமில்லை
விலைபோகாவிட்டாலும்
வீண்போகக் கூடாதென
நிலம் தேடி பயணிக்க
சிமெண்ட் வெப்பம் தாளாது
சாணிப்பால் மணம் நுகர்ந்திட
சாமிகளை வேண்டலானாள்
புழுதி வாசனை அற்று
புழுங்கும் இந்த பூமியில்
வாழ முடியாதிருக்க
குன்றுகள் இருந்த இடம் தேட
குழி குழியாய் பள்ளம் மிகுந்திருக்க
அடைக்கலமற்று அலைகிறோமென
அசரீரி கேட்க
மயங்கிச் சரிந்தாள்
தெறித்த விதைகளை
விளையாடிய சிறுவர்கள்
வீட்டுக்கொன்றாய் எடுத்துச் சென்றனர்.

நன்றி: கல்குதிரை