எதிர்விசை

இரு நாட்களை
அருகருகே உறங்கச் செய்தேன்
ஒன்று முன்னோக்கி உருள
மற்றதோ பின்நோக்கி உருண்டது
ஒவ்வொரு விசைக்கும்
எதிர்விசை
சமமானதுதான் போலும்...

முகம்

ஊரின் முகத்தை தீர்மானிக்க
அலையத் துவங்கினேன்
மேற்கிலிருந்து பார்க்க கிழக்கும்
கிழக்கிலிருந்து திரும்ப மேற்கும்
வடக்கிருந்து வர தெற்கும்
தெற்கிருந்து இறங்க வடக்குமென
எதிரெதிர் துருவங்கள்
முகப்பாய் மாற்றம்கொள்ள
தோல்வி பனிபோர்த்த வீடடைந்தேன்
நிலைக்கண்ணாடி
ஒற்றைத் தன்மையோடு தொங்கவிட்டது முகத்தை...

தரக்குடும்பம்

இரவை புணர்ந்தெழுந்ததும்
தொங்கவிடப்பட்ட வெள்ளை துணி மூடி
கொட்டாவி இறுமலை முடித்து
மூக்கின் துவாரங்களில்
காற்றோடு கணநேரம் பயிற்சித்தேன்
கற்பிக்கப்பட்டதை பிசகிடாது
பல் துடைப்பத்தில் பற்பசை இட்டேன்
குறுக்கும் நெடுக்குமாக அசைக்க
நினைவு உறுத்தியது
அய்யய்யோன்னு தலையிலடித்து
மேலும் கீழுமாக அசைத்து துலக்கினேன்
தர முத்திரையிட்ட
சோப்பு ஷாம்புகளால் உடல் கழுவினேன்
துணையாளும் அவங்களுக்கான அட்டவணையின்படி
ஸ்டிக்கரால் பெயரிடப்பட்ட டப்பாக்களிலிருந்து
வெகு எளிதாக சமைத்து முடிக்க
கொடுக்கப்பட்ட காலத்திற்குள் தயாராகி
காலனிகளின் அணிவகுப்பிலிருந்து
எனை பெயர்த்து வெளியேறினேன்
வெளிச்சுவற்றில் மின்னிக்கொண்டிருந்தது
என் தினக்கூலியை உத்திரவாதப்படுத்திக்கொண்டிருக்கும்
ISO தரச்சான்று இல்லமெனும்
பாலிமர் சீட்டில் பொறிக்கப்பட்ட
பச்சை எழுத்துக்கள்...

கணம் இடறிய கடவுள்

தெருவெங்கும் பிரதியெடுத்தவர்களை
சுடரிடும் கண்களுடன்
கழற்றிவைத்தாள் மதுவாகினி
உறுத்தல் யாவும் அடங்கியவுடன்
மீண்டும் கண்களை பொருத்திக்கொண்டவள்
அதிசயித்தாள்
எதிரிலிருந்த யுவன்களோடு
இரு வயோதிகரும்
ஒரு கடவுளரும் நின்றிருந்தனர்
முதலாமவரை நெருங்க
அறுபது வருடங்களை
உன் வாசம் அளித்து இருபதாக்கியதாலென்றார்
மற்றவரோ
மனம் கிடந்த பிம்பம்
பெயர்ந்து
வீதியில் உலா வந்ததாலென்றார்
எட்டி நின்ற கடவுளோ
கணம் இடறினேன் குழந்தாய்
ஆண்டாளெனவென்றார் 

உறக்கத்தில் நீந்திச் சென்றாள் மதுவாகினி
தன்னிருப்பின் சிலிர்ப்பில்...

இரு கோப்பைகளில்

இரு
கோப்பைகளில் கடலை
ஆற்றிக்கொண்டிருந்தவனிடம்
வேறெங்கு வாழ்வதென போராடின
மீன்கள்
மனமுடைந்த முதலைகள்
தற்கொலை பூண்டன
போக்கிடமற்று அலைந்தன பிற ஜீவராசிகள்
கூடை கூடையாய்
எல்லோரும் புசிக்கத் துவங்கினர்
மலிவு விலையில் மீன்களை...

கசப்பு

சோம்பிக் கிடந்த குழாயிலிருந்து
மழையை வரவழைத்துக்
கழுவிய இரு பாகற்காயை
துண்டாடினேன்
அலுப்பூட்ட விரும்பவில்லை
பொன்நிறமாகிட
வதக்கினேன்
சுவையறிய சிறுதுண்டை
நாக்கிலிட்டேன்
ஊறி ஊறி வழிந்த எச்சில்கள்
உடலுள் வளர்த்தது
ஒரு வேப்பமரத்தை

தவளைக்கு சிக்கிய மீன்

தூண்டிலிட்டது 

குளக்கரையிலிருந்து தவளை 

நீர் அதிர 

சிரித்தது சிக்கிய மீன் 

எனை பிடித்தென் செய்வாய்? 

ஏளனம் தரையில் வழிந்தது

மனித வசிப்பிட சிறையிலடைப்பேன் 

அங்கு உன் பெயர் தொட்டிமீன் 

சிறார்கள் உணவிடுவார்கள் 

தாளில் 

பிறப்பித்த மீனை 

துணைக்கு மிதக்கச் செய்வர் 

கழிவில் கசடான நீரை 

மறவாது மாற்றம் செய்வர் 

உனது வளர்ச்சிக்கு உண்டங்கு ஊசி

பெருமையின் அடையாளமாவாய் 

வந்துபோவோரெல்லாம் வேடிக்கையில் மகிழ்வர் 

ஒளிரூட்டி கதகதப்பாக்குவார்கள் 

ஒத்துப்போக ஓடித்திரியலாம்

முரண்கொள்ள செத்து மிதப்பாய் 

வீசி எறிய வேரொன்று இடம் நிரப்பும் 

என்றாவது விடுவிக்கவும்படலாம் 

வதை என்பதறியும் சிசு அவதரிக்க...

ஒரு பிளாட்டிற்கு ஓனராவதை விடவும் ஒரு பிளாக்கிற்கு ஓனராவது சுலபம்தானோ... நன்றி குணா.