பினாயல் மணம் கவ்விய
மருத்துவம் இட்ட அட்டவணையில்
நகரும் சீசாக்களின் துணையோடு
பிறப்பிக்கப்படுகிறார்கள் சிசுக்கள்

திரை நகரும் சித்திரங்களின்
அறிவுறுத்தலுக்கேற்ப பசி அறியாது
ஊட்டச் சத்தான உணவு கொடுத்து
சிசுக்கள் வளர்க்கப்படுகிறார்கள்

ஆசைகளை நிறைவேற்றிக் கொள்ள
லாபம் கொழிக்கும் மந்திரக் கேடயம் ஏந்த
இரவும் உறக்கமும் இல்லாதபோதே
சிசுக்கள் தின்றிடுகிறார்கள் கனவை

அபச்சாரம் அபச்சாரம்
இவனுங்களுக்கெல்லாம் எதற்கு
படிப்பை கெடுத்துக்கிட்டு
பன்றாங்களாம் அரசியல்
ஏளனப்படுகிறார்கள் சிசுக்கள்

விரலில் அசைவுறும் பொம்மையாகி
வம்பு தும்பற்று வாழ
போதனைக்குள்ளாகிறார்கள் சிசுக்கள்

நீர்மமாதல்

நாயொன்று
பெருத்த தீ முடிச்சொன்றை
நெடுநாளாய் உருட்டித் திரிந்தது பந்தாக
அந்தியில் சிறுவர்கள்
கண்ணாமூச்சி ர்ரே ர்ரே விளையாடினர்
பார்வையை இருட்டாக்கிக் கொண்டவன்
அறியாது கிழித்தான்
சப்தம் திசையெங்கும் பரவ
வானில் தங்கியது இடி
அதிர்வில் எழுந்தது மின்னல்
சிறார்கள் நனையத் துவங்கினார்கள்...